`Diálogos Inspiradores`: Cultura e Cooperativismo ao servizo do territorio

30/04/2025

• O evento contará con voces destacadas do sector para analizar retos e oportunidades da cultura no cooperativismo

O vindeiro 8 de maio ás 16:30 h, o Salón de Graos da Facultade de Ciencias Económicas e Empresariais da USC acollerá unha nova edición de Diálogos Inspiradores, unha iniciativa promovida polo grupo LIESGA no marco do programa #ConectaESGalega.

Nesta ocasión, o encontro pon o foco na cultura como motor de innovación social e desenvolvemento local, e no papel que o cooperativismo pode xogar como ferramenta transformadora ao servizo das persoas.

Falaremos de como a cultura e o emprendemento colectivo se entrelazan para dar resposta aos retos do territorio, apostando por modelos máis inclusivos, sostibles e conectados coa comunidade. Unha oportunidade para coñecer iniciativas que transforman a forma de producir, difundir e vivir a cultura.

Interveñen:

• Marta Mariño, Directora Xeral de Traballo Autónomo, Emprego e Economía Social da Xunta de Galicia.

• María Villamarón, socia traballadora de NUMAX S. Coop. Galega, responsable da libraría e comunicación.

• Isabel Neira, catedrática da Facultade de Ciencias Económicas e Empresariais da USC e integrante do grupo LIESGA.

Desde LIESGA convidámoste a participar e reflexionar connosco sobre como construír unha Galicia máis creativa, participativa e centrada no ben común.

A inscrición está aberta e pode realizarse a través do seguinte enlace.

Os ‘Diálogos Inspiradores’ forman parte da programación de ConectaESGalega, unha iniciativa que busca fomentar o diálogo entre a economía social e os sectores tecnolóxicos e innovadores en Galicia.